ḳhvab men ya ḳhayal men mujhe mil
tu kabhi ḳhadd-o-ḳhal men mujhe mil
mere dil ki dhamal men mujhe dekh
mere sur meri taal men mujhe mil
meri miTTi ko aankh di hai to phir
kisi mauj-e-visal men mujhe mil
mujhe kyuun arsa-e-hayat diya
ab inhen mah-o-sal men mujhe mil
kisi sub.h-e-firaq men mujhe chhoḌ
kisi shaam malal men mujhe mil
tu ḳhud apni misal hai vo to hai
isi apni misal men mujhe mil
tere shayan-e-shan hai vasf yahi
kisi vaqt-e-muhal men mujhe mil
mere kal ka pata nahin meri jaan
tu abhi mere haal men mujhe mil
mujhe mil kar uruuj de ya na de
mere vaqt-e-zaval men mujhe mil
Leave a Reply