aarzu vasl ki rakhti hai pareshan kya kya
kya bataun ki mire dil men hain arman kya kya
gham azizon ka hasinon ki judai dekhi
dekhen dikhlae abhi gardish-e-dauran kya kya
un ki khushbu hai fazaon men pareshan har su
naaz karti hai hava-e-chamanistan kya kya
dasht-e-ghurbat men rulate hain hamen yaad aa kar
ai vatan tere gul o sumbul o raihan kya kya
ab vo baten na vo raten na mulaqaten hain
mahfilen khvab ki surat huiin viran kya kya
hai bahar-e-gul-o-lala mire ashkon ki numud
meri ankhon ne khilae hain gulistan kya kya
hai karam un ke sitam ka ki karam bhi hai sitam
shikve sun sun ke vo hote hain pasheman kya kya
gesu bikhre hain mire dosh pe kaise kaise
meri ankhon men hain abad shabistan kya kya
vaqt-e-imdad hai ai himmat-e-gustakhi-e-shauq
shauq-angez hain un ke lab-e-khandan kya kya
sair-e-gul bhi hai hamen bais-e-vahshat ‘akhtar’
un ki ulfat men hue chaak gareban kya kya
Leave a Reply