Ye Zara Sa Kuchh Aur Ek-Dam Be-Hisab Sa Kuchh

Rajinder Manchanda Bani

ye zara sa kuchh aur ek-dam be-hisab sa kuchh

sar-e-sham siine men hanpta hai sarab sa kuchh

vo chamak thi kya jo pighal ga.i hai navah-e-jan men

ki ye aankh men kya hai shola-e-zer-e-ab sa kuchh

kabhi mehrban aankh se parakh is ko kya hai ye shai

hamen kyuun hai siine men is sabab iztirab sa kuchh

vo faza na jaane saval karne ke ba.ad kya thi

ki hile to the lab, mila ho shayad javab sa kuchh

mire chaar janib ye khinch ga.i hai qanat kaisi

ye dhuan hai ḳhatm-e-safar ka ya TuuTe ḳhvab sa kuchh

vo kahe zara kuchh to dil ko kya kya ḳhalal sata.e

ki na jaane us ki hai baat men kya ḳharab sa kuchh

na ye ḳhaak ka ijtinab hi koi rasta de

na uḌaan bharne de sar pe ye pech-o-tab sa kuchh

sar-e-sharh-o-iz.har jaane kaisi hava chali hai

ki bikhar gaya hai suḳhan suḳhan intiḳhab sa kuchh

ye bahar-e-be-saḳhta chali aa.i hai kahan se

tan-e-zard men khil uTha hai piile gulab sa kuchh

are kya bata.en hava-e-imkan ke khel kya hain

ki dilon men banta hai TuTta hai habab sa kuchh

kabhi ek pal bhi na saans li khul ke ham ne ‘bani’

raha umr bhar bas-ki jism o jaan men azaab sa kuchh