Rasheed Lakhnavi
hijr hai ab tha yahin men zaar ham pahlu-e-dost
mere bistar par mujhe taḌpa rahi hai bu-e-dost
ḳhatm zinat ho ga.i mashshata ne le liin bala.en
gesu-e-pur-ḳham ne chume shana-o-bazu-e-dost
imtihan quvvat ka hai talvar uTha.i jaati hai
ab to is qabil hue hain panja-o-bazu-e-dost
zaḳhm khata baḌh ke main aur vo lagata baḌh ke tegh
dil mira baḌhta to baḌhti quvvat-e-bazu-e-dost
ghaT gaya yaan ḳhuun aur vaan fasd ka saman hua
aa gaya ghash mujh ko jab bandha gaya bazu-e-dost
jaan aadhi rah ga.i dekhi jo ghusse ki nazar
dil pe ik bijli giri jab hil ga.e abru-e-dost
mujh ko jin se ishq hai un ko hai mujh se dushmani
yaan vo aate the ki uljhe paanv gesu-e-dost
ka.aba jis ko log kahte hain makan hai yaar ka
arsh-e-a.azam naam rakhte hain zamin-e-ku-e-dost
mere siine men hui kyuun ḳhana-e-dil ki bina
ye makan banne ke qabil thi zamin-e-ku-e-dost
zaḳhmi-e-ulfat huun main sehat nahin hogi mujhe
bhar rahi hai dil ke zaḳhmon men hava.e ku-e-dost
baḳhshti hai ruuh ko har martaba ik tazgi
mujh ko marne hi nahin deti hava-e-ku-e-dost
talib-e-didar hain hai saaf ankhon se ayaan
go ki munh se kuchh nahin kahte gada-e-ku-e-dost
dushman iiza dete hain har martaba mujh ko ‘rashid’
ghussa aata hai magar main dekhta huun su-e-dost
Leave a Reply