Fusun Kar Gai Raat Pagal Hawa

fusūñ kar ga.ī raat pāgal havā

uḌā le ga.ī surḳh āñchal havā

huī jis ghaḌī dhuul se dostī

banī dasht-e-ġhurbat meñ bādal havā

mujhe zindagī ik gulistāñ lage

dikhā chal ke ab us ko jañgal havā

jalā de irādoñ ke tūfān ko

bujhā de agar terī mash.al havā

saḌak par badan ik paḌā dekh kar

chalī ghuum kar sū-e-maqtal havā

ḳhushī ke charāġhoñ ne samjhā hai kab

tujhe ai shab-e-ġham kī bojhal havā

lahū raat kī raat girtā rahā

rahī raat kī raat jal-thal havā

Leave a Comment