kaTi pahaḌ si shab intizar karte hue
hui tamam sahar ah-e-sard bharte hue
the us ke haath lahu men hamare gharq magar
zara bhi sharm na aa.i use mukarte hue
hava chali to pareshan hue shajar auraq
magar na the vo hamari tarah bikharte hue
kabhi udhar se jo guzren to yaad aata hai ye
ki us ko dekhta tha us raah se guzarte hue
hamesha soch men Duuba hua vo ham ko mila
kabhi to dekhte ‘farruḳh’ ko ham ubharte hue
Leave a Reply