Gulon Ke Parde Mein Shaklen Hain Mah-Jabinon Ki

gulon ke parde men shaklen hain mah-jabinon ki

ye Daliyan hain ki hain Doliyan hasinon ki

ye astinen nahin hain chuni hui zalim

balaen li hain nigahon se astinon ki

kisi ke jalve sar-e-arsh chhup nahin sakte

ki duur rasan hain nigahen buland binon ki

pas-e-fana bhi na khali rahen ye qasr-e-rafia

na hon makin to qabren rahen makinon ki

kis intiha ki nazakat hai mere sheron men

nazar lage na kahin un ko nukta-chinon ki

jo niind aae to yuun aae maut aae to yuun

hamare samne shaklen hon mah-jabinon ki

ham apne mulk-e-sukhan ko vasia karte hain

hamen talash hai har-dam nai zaminon ki

unhen gharaz miri baten khade khade sun len

sunenge baith ke vo apne ham-nashinon ki

kahan vo chandni raten vo chand ke tukde

na ab vo ham hain na shaklen hain mah-jabinon ki

utarte hain nae mazmun jo asman se ‘riyaz’

talash rahti hai ham ko nai zaminon ki

Leave a Comment