phulon ki hai taḳhliq ki sho.alon se bana hai
kandan sa tira jism jo ḳhushbu men basa hai
jangal ke ghazalon pe ajab ḳhauf hai taari
tufan koi shahr ki janib se uTha hai
ye husn-e-chaman hai mire ehsas ki taḳhliq
varna kahin gul hai na kahin mauj-e-saba hai
har lafz tire chehre ki tasvir bana tha
kis karb se sau baar tire ḳhat ko paḌha hai
Daalo mire kanon men bhi pighla hua siisa
ai barhamno main ne bhi to ved suna hai
tum DhunDte phirte ho jise sehn-e-chaman men
vo shaḳhs abhi kucha-e-qatil ko gaya hai
Leave a Reply