mera afsana juda teri kahani aur hai
gham ka raaja aur hai ḳhushiyon ki raani aur hai
farq lahjon ka hua karta hai lafzon ka nahin
hai alag sho.ala-fishani ḳhush-bayani aur hai
main to us ke bas men huun muddat se huun us ka asiir
jiit hai taaza koi ye kamrani aur hai
naam le kar jis tarah us ne pukara hai mujhe
us ke is lahje se mujh ko ḳhush-gumani aur hai
ab ke shayad us pe bhi mushkil raha hijr-o-firaq
ab ke mehmanon se tarz-e-mezbani aur hai
jaane kis ke lams ki ab ke tamanna hai unhen
in baharon men gulabon par javani aur hai
muskurana to hai us ki aam si aadat ‘na.im’
us ke iz.har-e-mohabbat ki nishani aur hai
Leave a Reply