Sahba Akhtar
ba-rang-e-sher gire aur baar baar gire
hamare zehn pe kirnon ke abshar gire
ghamon ki raah men sabit-qadam hain divane
bisat-e-aish pe kitne nashat-e-kar gire
chaman khula to na.i nik.haton ke anchal par
shaguft-e-gul se tire aks be-shumar gire
zamin chand ka TukḌa hai jis ki zulmat par
ka.i ujale har ik shab sitara-var gire
hamen bhi fursat-e-yak-ḳhvab us faza men jahan
kiran kiran lab-o-ruḳhsar ki phuvar gire
ubhar raha hai jo mashriq ke har ḳharabe se
kise ḳhabar ki kahan ja ke ye ghubar gire
Leave a Reply