ham aise log jald asir-e-ḳhizan hue
lekin ghurur-o-tamkanat-e-gulistan hue
tufan-e-ahd-e-taza tira shukriya ki ab
jitne sitare zehn men chamke dhuan hue
aa.e hain phuul dhuup se bachne miri taraf
mera hi dil hai chand jahan mehman hue
jab tum mile to samne mai-ḳhana mil gaya
aur falsafe hayat ke sab ra.egan hue
meri nazar se aaj gurezan hai gulistan
meri nazar ki chhanv men ghunche javan hue
ab kuchh nahin hai ma.abad-e-geti ḳhata muaaf
moti se ashk sarf-e-mah-o-kahkashan hue
ab ma-hasal hayat ka bas ye hai ai ‘salam’
cigarette jala.i sher kahe shadman hue
Leave a Reply