kabhi sukun to kabhi iztirab bhi jhela
khuli jo aankh to anjam-e-ḳhvab bhi jhela
qadam qadam pe purane sabaq bhi yaad aa.e
qadam qadam pe badalta nisab bhi jhela
bayaz-e-dil ke sunahre huruf bhi chume
kitab-e-jan pe likha intisab bhi jhela
hamara haq bhi musallam tha qatre qatre par
hamin ne tishna-labi ka azaab bhi jhela
kabhi jo a.ina-ḳhane ki sair ko nikle
to ek manzar-e-ḳhud ehtisab bhi jhela
chale to saare zamane ko saath le ke chale
ruke to alam-e-ḳhud-ijtinab bhi jhela
na jaane kis ki rahi justuju ‘ziya’ ham ko
ki ham ne ik dil-e-ḳhana-ḳharab bhi jhela
Leave a Reply