Mera Wajud Qabil-E-Sahra to Hai Nahin

merā vajūd qābil-e-sahrā to hai nahīñ

saudā tumhāre ishq kā rakkhā to hai nahīñ

behtar hai bhuul jā.ūñ maiñ us kī muḳhālifat

us se najāt kā koī zarīya to hai nahīñ

is dil meñ ek halqa-e-ahbāb aur hai

ḳhālī tumhāre naam kā Thappa to hai nahīñ

agnī ke saat phere liye haiñ tumhāre saath

ḳhālī ye chand roz kā rishta to hai nahīñ

duniyā tamāshbīn hai dekhe to dekh le

āḳhir ye āshiqī mirā pesha to hai nahīñ

sar jhuk gayā tumhārā magar dil nahīñ jhukā

sajda tumhārā shaiḳh jī sajda to hai nahīñ

‘anvar’ chalā gayā tire dar se ye soch kar

tā-umr ab mujhe vahāñ rahnā to hai nahīñ

Leave a Comment