mahfil men jis jagah bhi mira tazkira hua
dekha har ek shaḳhs ka munh tha phula hua
urdu ke vaste na kiya us ne kuchh kabhi
urdu ke naam se hai ghar us ka bhara hua
ghurbat-kade ka hashr to hona tha bas yahi
logon ke aane jaane se ik rasta hua
mil to nahin ga.i koi dokan-e-sha.iri
phirta hai jo akaḌ ke vo sha.ir bana hua
har samt qatl-e-am hai aur shahr qatl-gah
hakim hai shahrah par gum-sum khaḌa hua
nausha bana ke chhoḌa mire dushmanon ne ab
phirta huun us ke saath men tosha bana hua
mere hi munh pe meri ghazal vo suna gaya
aisa bhi mere saath yahan hadisa hua
main be-hisi ke shahr men rahta huun is tarah
sagar kinare jaise ho putla khaḌa hua
rahne do yuun hi hansta-hansata ‘rahim’ ko
chheḌo na us ko dosto dil hai dukha hua
Leave a Reply