Mahfil Mein Jis Jagah Bhi Mera Tazkira Hua

mahfil meñ jis jagah bhī mirā tazkira huā

dekhā har ek shaḳhs kā muñh thā phulā huā

urdu ke vāste na kiyā us ne kuchh kabhī

urdu ke naam se hai ghar us kā bharā huā

ġhurbat-kade kā hashr to honā thā bas yahī

logoñ ke aane jaane se ik rāsta huā

mil to nahīñ ga.ī koī dokān-e-shā.irī

phirtā hai jo akaḌ ke vo shā.ir banā huā

har samt qatl-e-ām hai aur shahr qatl-gāh

hākim hai shāhrāh par gum-sum khaḌā huā

nausha banā ke chhoḌā mire dushmanoñ ne ab

phirtā huuñ us ke saath meñ tosha banā huā

mere hī muñh pe merī ġhazal vo sunā gayā

aisā bhī mere saath yahāñ hādisa huā

maiñ be-hisī ke shahr meñ rahtā huuñ is tarah

sāgar kināre jaise ho putlā khaḌā huā

rahne do yuuñ hī hañstā-hañsātā ‘rahīm’ ko

chheḌo na us ko dosto dil hai dukhā huā

Leave a Comment