Tashna Azmi
chaman chaman na rahega jo teri bu na rahe
main us ḳhayal se Darta huun jis men tu na rahe
jo tera aks bhi mujh ko nasib ho jaa.e
miri talash mukammal ho justuju na rahe
ye aarzu hai ki tujh sa tamam duniya men
siva.e mere koi aur hu-ba-hu na rahe
khulenge dil ke dariche suhane mausam men
is intizar men na-kam aarzu na rahe
jo zindagi ko zara bhi sukun aa jaa.e
to roz-o-shab ki musalsal ye hav-hu na rahe
ye baat mere yaqin ke ḳhilaf hai ‘tashna’
kisi mahaz pe tu aur surḳh-ru na rahe
Leave a Reply