main hadd-e-la-makani chahta huun
ye kaisi sargirani chahta huun
tiri ankhon men paani chahta huun
bas itni mehrbani chahta huun
jise sunte hi so jaate the bachche
vahi bhuli kahani chahta huun
ye hai meri tabi.at ka taqaza
har ik pal imtihani chahta huun
nahin lagta mira ab shahr men ji
haqiqat dastani chahta huun
ka.i raton se niind aa.i nahin hai
main kuchh jhuTi kahani chahta huun
miri is sadgi ki daad to de
tira va.ada zabani chahta huun
koi gum-karda-e-manzil mile to
main apna naqsh-e-sani chahta huun
tumhari guftugu men ‘shan’ sahab
ghazal jaisi ravani chahta huun
Leave a Reply