Poet
hayat-o-maut ki uljhan men Dalta kyon hai
ye tohmaten mire uupar uchhalta kyon hai
ab aa gaya huun to ḳhatre men Dalta kyon hai
andheri raat men ghar se nikalta kyon hai
abhi mo.amla-e-ka.enat tai kar de
zara si baat qayamat pe Talta kyon hai
kisi tarah bhi to insan tira harif nahin
phir is gharib ko tu maar Dalta kyon hai
nadim tera to is men koi mafad nahin
main gir raha huun tu mujh ko sanbhalta kyon hai
mujhe bacha na sakega tu gharq hone se
fuzul ḳhud ko halakat men Dalta kyon hai
kisi tarah to ye ehsas ka azaab miTe
tu mere siine se ḳhanjar nikalta kyon hai
tu apni fikr ko kuchh bhi samajh magar ‘tahir’
kisi ke sher men kiiḌe nikalta kyon hai
Leave a Reply