Raza Amrohvi
dil men jhanka to bahut zaḳhm purane nikle
ik fasane se ka.i aur fasane nikle
ḳhvab to ḳhvab the a.ankhon men kahan ruk jaate
vo dabe paanv unhen bhi to churane nikle
dekhna ye hai Thaharta hai kahan josh-e-junun
sar-phire shahr-e-nigaran ko jalane nikle
apne ghar sang-e-malamat ki hui hai barish
be-gunahi ki sanad ham jo dikhane nikle
karobar-e-rasan-o-dar ki tash.hir hui
sarfaroshi ke yahan kitne bahane nikle
jin kitabon pe saliqe se jami vaqt ki gard
un kitabon hi men yadon ke ḳhazane nikle
vo sitam-kesh bahr-e-hal sitam-kesh rahe
dard soya bhi nahin tha ki jagane nikle
har taraf shahr men virani ka aalam hai ‘raza’
zindagi kaun kahan tujh ko sajane nikle
Leave a Reply