falak ne bheje hain kya jaane kis vasile se
lahu ke bahr men bhi kuchh sadaf hain niile se
abhi to qafila-e-bad sabz raah men hai
isi liye to hain ashjar-e-dasht piile se
jo mere saath hai sadiyon se misl-e-aks-e-bahar
ḳhabar nahin ki hai vo shaḳhs kis qabile se
paḌa hai kab se siyah-posh mera dasht-e-badan
charagh is men jala de kisi bhi hiile se
qayas kahta hai un ke aqab men hai suraj
chamak rahe hain ufaq par jo zard Tiile se
hai lams-e-ab se mahrum dasht-e-ḳhak-o-hava
na jaane kis liye zarrat phir hain giile se
ragon men aaj bhi raushan hain surḳh-o-zard charagh
ajiib shai the vo ishrat badan nashile se
Leave a Reply