kaam asan hai magar dekhiye dushvar bhi hai
aage darvaze ke rakkhi hui divar bhi hai
dene vaale se mujhe koi shikayat kyuun hai
raah men dhuup bhi hai saya-e-ashjar bhi hai
qatl kar ke jo mujhe saa.e men phenk aaya hai
log kahte hain vahi mera taraf-dar bhi hai
tujh ko bas apni hi tasvir nazar aati hai
aa.ine men kahin hairat kahin zangar bhi hai
kyuun bhala vaqt ka nuqsan karoge pyare
jo yahan ab hai tamasha vahi us paar bhi hai
mere aaba se mujhe kya na mila hai ‘hamdam’
taaq men dekhiye mus.haf bhi hai talvar bhi hai
Leave a Reply