ai mah-e-hijr kya kahen kaisi thakan safar men thi
ruup jo rahguzar men the dhuup jo rahguzar men thi
lafz ki shakl par na ja lafz ke rang bhi samajh
ek ḳhabar pas-e-ḳhabar aaj ki har ḳhabar men thi
raat fasil-e-shahr men ek shigaf kya mila
ḳhuun ki ik lakir si sub.h nazar nazar men thi
meri nigah men bhi ḳhvab teri nigah men ḳhvab
ek hi dhun basi hui asr-e-ravan ke sar men thi
shahr pe ratjagon se bhi bab-e-ufuq na khul saka
vus.at-e-bam-o-dar ‘najib’ vus.at-e-bam-o-dar men thi
Leave a Reply