Mere Shikwe Ka Zara Us Pe Asar Ho to Sahi

mere shikve kā zarā us pe asar ho to sahī

mehrbāñ mujh pe kabhī us kī nazar ho to sahī

dekhne vaale mirā azm-e-safar dekheñge

manzil-e-shauq koī pesh-e-nazar ho to sahī

jalve qudrat ke to bikhre hue kaunain meñ haiñ

dekhne vaalā koī ahl-e-nazar ho to sahī

maiñ masarrat bhare lamhoñ kā karūñ istiqbāl

mire hisse meñ hasīñ shām-o-sahar ho to sahī

muskurāne kī tamannā to mujhe hai lekin

koī lamha ġham-e-daurāñ se mafar ho to sahī

hech har chiiz zamāne kī nazar aa.egī

tujh ko ḳhud apnī haqīqat kī ḳhabar ho to sahī

maiñ bhī ‘ma.asūm’ samajh lūñgā hai duniyā jannat

aish-o-ārām se kuchh roz basar ho to sahī

Leave a Comment