Dard Ka Mere Yaqin Aap Karen Ya Na Karen

dard ka mere yaqin aap karen ya na karen

arz itni hai ki is raaz ka charcha na karen

laakh ghafil sahi par aise bhi ham kor nahin

ki chaman dekh ke zikr-e-chaman-ara na karen

aql-o-danish se to kuchh kaam na nikla apna

kab tak aḳhir dil-e-divana ka kahna na karen

vo nigahen ajab andaz se hain ishva-farosh

gham-e-pinhan ko hamare kahin rusva na karen

tere ashufta-sar aise bhi nahin sauda.i

ki dil-o-din ke liye zulf ka sauda na karen

main ne behuda tavaqqo ki saza paa.i hai

kuchh ḳhayal aap miri hasrat-e-dil ka na karen

mere armanon ko kaash itni samajh ho ‘vahshat’

ki un ankhon se muravvat ka taqaza na karen