savalon men ḳhud bhi hai Duubi udasi
kahin le na Duube mujhe bhi udasi
shab-o-roz chalti hai pahlu se lag kar
gale paḌ ga.i ek ziddi udasi
fazaon ki rangat nikharne lagi hai
hui shaam phir dil men lauTi udasi
zara chand kya aaya meri taraf ko
sitaron ne jal-bhun ke oḌhi udasi
shabistan men gham ki na sham.en jalao
kahin jaag jaa.e na soi udasi
zara der logon men khul kar hansi phir
sar-e-bazm ankhon se Tapki udasi
use yaad thi kal ki tariḳh shayad
sisakti rahi le ke hichki udasi
jami thi mire sard siine men kab se
tapish pa ke ashkon ki pighli udasi
katarti hai dil ke shajar ki ye ḳhushiyan
tiri yaad hai ya gilahri udasi
kabhi ham the jin ki duaon men shamil
unhin tak na pahunchi hamari udasi
tiri yaad ke ab nishan tak nahin ham
magar dil men rahti hai ab bhi udasi
nigahon men hadd-e-nazar tak hai raqsan
udasi udasi udasi udasi
Leave a Reply