ek jalva ek naghma ek paimana abhi
zindagi ka ham-nashin mat chheḌ afsana abhi
lazzat-e-sahba se huun saqi-e-begana abhi
ho raha hai band kyuun hasti ka mai-ḳhana abhi
hairat-e-jalva miri ankhon ka parda ban ga.i
huun sar-e-manzil magar manzil se begana abhi
dekh to pi kar zara si aaj sahba-e-ḳhudi
dekh banta hai jahan ik a.ina-ḳhana abhi
khul gaya gar mai-kashon par dard-e-sahba ka bharam
guunj uTThega nava-e-gham se mai-ḳhana abhi
sun rahe hain qissa-e-adam azal se ham magar
hai vahi kaifiyyat-e-aghaz-e-afsana abhi
kasa-e-dil ko mujalla aur kar luun to chalun
darḳhur-e-husn-e-azal kab hai ye nazrana abhi
gesu-e-kaunanin to minnat-kash-e-shana nahin
haan magar uljha hua hai zehn-e-farzana abhi
jis qadar piita gaya main tishnagi baḌhti ga.i
bas yahi thi aarzu aur ek paimana abhi
sidq-e-dil se saqi-e-fitrat ko ik avaz de
dekh aata hai tire hathon men paimana abhi
fursat-e-nazzara kab hasil hui ‘farhat’ mujhe
huun asir-e-kar-gah-e-husn-e-janana abhi
Leave a Reply