unhen ye fikr hai har dam na.i tarz-e-jafa kya hai
hamen ye shauq hai dekhen sitam ki intiha kya hai
gunah-garon men shamil hain gunahon se nahin vaqif
saza ko jante hain ham ḳhuda jaane ḳhata kya hai
ye rang-e-be-kasi rang-e-junun ban ja.ega ghafil
samajh le yas-o-hirman ke maraz ki intiha kya hai
naya bismil huun main vaqif nahin rasm-e-shahadat se
bata de tu hi ai zalim taḌapne ki ada kya hai
chamakta hai shahidon ka lahu parde men qudrat ke
shafaq ka husn kya hai shoḳhi-e-rang-e-hina kya hai
umiden mil ga.iin miTTi men daur-e-zabt-e-aḳhir hai
sada-e-ghaib batla de hamen hukm-e-ḳhuda kya hai
Leave a Reply