Har Mauqe Ki Har Rishte Ki Dher Nishani Uske Pas

Pratap Somvanshi

har mauqe ki har rishte ki Dher nishani us ke paas

album ke har ik photo ki ek kahani us ke paas

shahr vo sahukar hai jis ko kos raha hai har koi

ye sach bhi sab ko ma.alum hai dana-pani us ke paas

amman ki baton men ankhen sukh-dukh sapne sab to hain

ram-kahani us ke paas kabira-bani us ke paas

ka.i ḳhazane qisse vaale ik bachche ke paas mile

daada daadi us ke paas naana naani us ke paas

soch raha huun gaanv men ja kar kuchh din ab aram karun

vahin kahin par rakh aaya huun niind purani us ke paas