tishna-kamon ko yahan kaun subu deta hai
gul ko bhi haath lagao to lahu deta hai
neshtar aur sahi kar-e-digar aur sahi
dil-e-sad-chak agar izn-e-rafu deta hai
tab-e-fariyad bhi de lazzat-e-bedad bhi de
dene vaale jo mujhe soz-e-gulu deta hai
ham to barbad hue barg-e-ḳhizan ki surat
shaḳh-e-gul kaun tujhe zauq-e-numu deta hai
munsifo haath se ab dashna-o-ḳhanjar rakh do
kya bura hai agar insaf adu deta hai
ai ḳhudavand mire sher ki qimat kya hai
ek roTi ka nivala jise tu deta hai
Leave a Reply