Waseem Tashif
achchha lag jaa.e kya bura lag jaa.e
us ki qurbat men ḳhauf sa lag jaa.e
bas vo ik sarsari nazar Daale
aur bimar ko shifa lag jaa.e
us ka inkar aise lagta hai
jaise paanv men kanTa lag jaa.e
dhund men haath chhoḌne vaale
tujh ko mausam ki bad-dua lag jaa.e
kaise us ka vajud sabit ho
mulhidon ko agar ḳhuda lag jaa.e
roz ik baagh se guzarte hue
tujh badan ka mughalta lag jaa.e
aap kya soch kar kahin us ko
us ki marzi hai us ko kya lag jaa.e
Leave a Reply