Kuchh din To Malal Us Ka Haq Tha

kuchh din to malal us ka haq tha

bichhda to khayal us ka haq tha

vo raat bhi din si taaza rakhta

shabnam ka jamal us ka haq tha

vo tarz-e-bayan men chandni tha

taron se visal us ka haq tha

tha us ka khiram mauj-e-dariya

lahron ka jalal us ka haq tha

barish ka badan tha us ka hansna

ghunche ka khisal us ka haq tha

rakhta tha sambhal shisha-e-jan

tajsim-e-kamal us ka haq tha

badal ki misal us ki khu thi

tabir-e-hilal us ka haq tha

ujla tha chambeliyon ke jaisa

yusuf sa jamal us ka haq tha