aleena-itrat

Nazm Takmil

kahin pe duur kisi ajnabi si ghati men

kisi ka ek hasin shahkar ho jaise

musavviri ki ik umda misal lagti thi

koi ina.yat-e-parvar-digar ho jaise

ye zindagi ki har ik rang se thi begani

khayal o khvab ki baton se thi vo anjani

banane vaale ne us ko bana ke chhoda tha

aur us ke chehre pe ik naam likh ke chhoda tha

na di zaban na koi aina diya us ko

bana ke but yuun zamin par saja diya us ko

use zamane ki baton se kuchh gila hi na tha

sivae jism ke ehsas kuchh mila hi na tha

phir ek roz kisi narm narm jhonke ne

kaha ye kaan men aa kar bahut hi chupke se

zara sa ankhon ko kholo to tum ko dikhlaun

mahakti zindagi kaise hai tum ko sikhlaun

kahan se aai ho kab se yahan khadi ho tum

mire vajud ke har rang se judi ho tum

ye gungunati hui vadiyan ye gul-kari

nadi ki jhumti gaati hui ye kilkari

ye dhuup chhanv ke badal ye makhmali ehsas

machal rahe hain bahut pyaar se tumhare paas

mahakte dil hain yahan khushbu-e-mohabbat se

khuda ke nuur se paida hui hararat se

hava ka jhonka jo kanon men us ke bol gaya

to us ne chaunk ke palkon ko apni khol diya

ye vadiyon ka hasin rang us ne jab dekha

hui ye soch ke hairan us ne ab dekha

badan men jitne the ehsas vo machalne lage

nazare us ki nigahon ke saath chalne lage

ye rang o nuur ke qisse samajh men aane lage

hasin ankhon men kuchh khvab jhilmilane lage

aur aise ho ke mukammal vo husn ki murat

kisi ke pyaar ki khushbu se ban gai aurat

More Poems

Leave a Comment