ehsas men phuul khil rahe hain
patjhad ke ajiib silsile hain
kuchh itni shadid tirgi hai
ankhon men sitare tairte hain
dekhen to hava jami hui hai
sochen to darakht jhumte hain
suqrat ne zahr pi liya tha
ham ne jiine ke dukh sahe hain
ham tujh se bigad ke jab bhi uthe
phir tere huzur aa gae hain
ham aks hain ek dusre ka
chehre ye nahin hain aaine hain
lamhon ka ghubar chha raha hai
yadon ke charagh jal rahe hain
suraj ne ghane sanobaron men
jaale se shuaon ke bune hain
yaksan hain firaq-o-vasl donon
ye marhale ek se kade hain
pa kar bhi to niind ud gai thi
kho kar bhi to rat-jage mile hain
jo din tiri yaad men kate the
maazi ke khandar bane khade hain
jab tera jamal dhundte the
ab tera khayal dhundte hain
ham dil ke gudaz se hain majbur
jab khush bhi hue to roe hain
ham zinda hain ai firaq ki raat
pyari tire baal kyuun khule hain
Leave a Reply