baharen aur vo rangin nazare yaad aate hain
vo dilkash vadiyan vo mah-pare yaad aate hain
mohabbat ke vo jan-parvar sahare yaad aate hain
tiri aghosh men jo din guzare yaad aate hain
vo mausam vo saman vo din vo sub.h-o-sham vo raten
vo hanste nachte gaate sitare yaad aate hain
vo jhilen vo chaman vo ghuncha-o-gul aur vo sabza
mire dil ko vo manzar pyare pyare yaad aate hain
masarrat-baḳhsh tha kitna tarannum absharon ka
vo lahren vo sukun-parvar kinare yaad aate hain
vo jalve husn ke vo shahid-e-rangin ki ra.ana.i
shabab-e-kaif-o-masti ke vo dhare yaad aate hain
vo zulfen vo ada.en aur vo rang-e-lab-o-ariz
ghazalin ankhḌiyon ke vo ishare yaad aate hain
nashat-e-ruh ai meri bahar-e-zindagi mujh ko
tire pahlu men jo lamhe guzare yaad aate hain
Leave a Reply