Qarib-O-dur

Nahid Qasmi

mujh se anjan bane duur bahut duur sahi

samne baitha nazar aata hai

mujh ko mahsus ye hota hai miri umr ke saare lamhe

titliyan ban ke tiri samt ude jaate hain

aur tire chaar taraf

rang-dar-rang kai haale banate hue lahrate hain

phuul chun chun ke palat aate hain

mujhe mahkate hain

mujh se anjan bane

paas bahut paas se to jab guzre

mujh ko mahsus ye hota hai miri umr ke saare lamhe

ruuth kar mujh se bahut duur kisi sahra men

dhuup men jalte hain

tapte hue zarron se lipat jaate hain

aur chingariyan ban ban ke palat aate hain

mujhe jhulsate hain

Reader Interactions