Poet
jaata raha qalb se saari khudai ka ishq
qabil-e-tarif hai tere fidai ka ishq
kaisi musibat hai ye gul ko khamoshi ka shauq
bulbul-e-betab ko harza-sarai ka ishq
pad gai bakne ki lat varna yahan tak na tha
vaiz-e-na-faham ko harza-sarai ka ishq
karta huun jo baar baar bosa-e-rukh ka saval
husn ke sadqe se hai mujh ko gadai ka ishq
tum ko khuda ne diya saari khudai ka husn
mujh ko ata kar diya saari khudai ka ishq
ashiq o maashuq ki haae nibhe kis tarah
un ko kudurat ka shauq mujh ko safai ka ishq
puchh le ‘parvin’ se ya qais se daryaft kar
shahr men mashhur hai tere fidai ka ishq
Leave a Reply