Asra Rizvi
aag jo dil men lagi hai vo bujha di jaa.e
phir koi taaza ghazal aaj suna di jaa.e
zinat-e-jism bane ruuh ko chhalni kar de
aisi har rasm zamane se miTa di jaa.e
sunte hain ishq ka bazar bahut garm hai phir
qimat-e-husn zara aur baḌha di jaa.e
ik jhalak ke liye sau baar sar-e-bam gaya
atish-e-shauq ko kuchh aur hava di jaa.e
raaz siine men daba hai jo sar-e-bazm kahun
sirf ik baar mujhe us ki raza di jaa.e
zindagi dhuup men jalte hue kaaTi jis ne
saaya mil jaa.e koi us ko dua di jaa.e
ja-ba-ja aks meri ankhon men ubhre jis ka
us ki tasvir bhi ab dil se haTa di jaa.e
vaqt aajil hai safar tuul hai dam ankhon men
ruḳh-e-janan se naqab ab to uTha di jaa.e
tishnagi aankh ki kam ho koi surat nikle
pas-e-parda hi jhalak kaash dikha di jaa.e
munjamid koh-e-nida par hai taghaful se tire
hiddat-e-chashm-e-karam us pe luTa di jaa.e
muskurate hue sar siine pe rakh kar bole
maraz-e-ishq hai lazim hai dava di jaa.e
ye bhi mumkin hai magar tab ki vo ḳhud aa ke kahe
baat jo dil ko dukhati hai bhula di jaa.e
Leave a Reply