kitne hi ped khauf-e-khizan se ujad gae
kuchh barg-e-sabz vaqt se pahle hi jhad gae
kuchh andhiyan bhi apni muavin safar men thiin
thak kar padav daala to kheme ukhad gae
ab ke miri shikast men un ka bhi haath hai
vo tiir jo kaman ke panje men gad gae
suljhi thiin gutthiyan miri danist men magar
hasil ye hai ki zakhmon ke tanke ukhad gae
nirvan kya bas ab to amaan ki talash hai
tahzib phailne lagi jangal sukad gae
is band ghar men kaise kahun kya tilism hai
khole the jitne qufl vo honton pe pad gae
be-saltanat hui hain kai unchi gardanen
bahar saron ke dast-e-tasallut se dhad gae
Leave a Reply