utne hi asan kar leta hai gham ke marhale
jis ka jitna azm-o-himmat jis ke jitne hausle
haa.e fitrat ke bhi kitne saḳht-tar hain faisle
phuul jaisi ḳhubsurat chiiz kanTon men pale
manzil-e-daman tak un ki koi pahuncha hi nahin
muddaton se go ravan hain ansuon ke qafile
saḳhtiyon ne kar diya hai mujh ko manzil se qarib
raah ki dushvariyon se baḌh ga.e hain hausle
ham taraste hi rahe phir bhi ujale ke liye
chand ubhre saikḌon aur saikḌon suraj Dhale
kuchh sunana chahte the ham bhi tujh ko hal-e-dil
kuchh tiri nazron ne bhi baḳhshe hain dil ko hausle
kyon mohabbat hi pe paḌti hai nazar har ek ki
aur bhi to hain ‘ḳhalish’ duniya men lakhon mashghale
Leave a Reply