raah donon ki vahi hai samna ho ja.ega
hoga nazron ka tasadum hadisa ho ja.ega
tum se chhuTa bhi agar to zindagi hai ik safar
saath mere aur koi dusra ho ja.ega
dil ki uftad-e-tabi.at ko bhala rokega kaun
phir kisi gham men kisi din mubtala ho ja.ega
qafile valon men tabligh-e-safar karte raho
kuchh na kuchh to rahbari ka haq ada ho ja.ega
us se be-maqsad bhi tum yuun hi agar milte rahe
vo ghalat-fahmi men ik din mubtala ho ja.ega
kya ḳhabar thi ik sara.e ke musafir ki tarah
ham-safar hoga vo mera phir juda ho ja.ega
azm-e-manzil hai to ‘mahir’ be-ḳhatar baḌhte chalo
un chaTTanon men bhi paida rasta ho ja.ega
Leave a Reply