chaman men bulbulon ke jhurmuT kabhi idhar ko kabhi udhar ko
isi se hai gul ko bhi lagavaT kabhi idhar ko kabhi udhar ko
ye kahiyo dekha kiya huun zalim uTha ke balin se sar ko har dam
samajh ke paanv ki tere aahaT kabhi idhar ko kabhi udhar ko
tiri juda.i men raat saari saba ye kahna ba-ah-o-zari
badalte guzri hai mujh ko karvaT kabhi idhar ko kabhi udhar ko
bhala batao to ḳhalq kyuun kar do rasta rakkhen na haat dil par
laḌata hai ankhḌiyan vo naT-khaT kabhi idhar ko kabhi udhar ko
gaya jo gulshan men mera gul-ru to kaliyan phulon ki pa ke qaabu
bala.en leti hain us ki chaT-chaT kabhi idhar ko kabhi udhar ko
kabhi ye be-dil kabhi vo be-dil safa.i honi hai in men mushkil
rahegi baham yuun hi rukavaT kabhi idhar ko kabhi udhar ko
ye kah do ashiq ka us sanam se dil-o-jigar ab ḳharash-e-gham se
gire hai ashkon ke saath kaT kaT kabhi idhar ko kabhi udhar ko
ye hai nasheb-o-faraz-e-duniya abas hai is ka ḳhayal karna
jahan men hote hain yuun hi jamghaT kabhi idhar ko kabhi udhar ko
jo dekhe kaala to kha mare sam ye us ke mukhḌe pe ‘aish’ jis dam
hava se hoti hai zulf ki laT kabhi idhar ko kabhi udhar ko
Leave a Reply