gardish men hai zamin bhi kya asman ke saath
duniya badal ga.i nigah-e-mehrban ke saath
dohrana anjuman men samajh soch ke use
teri bhi dastan hai miri dastan ke saath
ab main huun aur kunj-e-qafas ki musibaten
vo ashiyan ki baat ga.i ashiyan ke saath
betabiyon se rabt tha bechainiyon se kaam
guzre hain aise din bhi us aram-jan ke saath
roz-e-azal vahi to faqat mustahiq na tha
kuchh gardishen hamen bhi milin asman ke saath
gham ko tire bhula na saka do-jahan ka gham
tera bhi gham raha hai gham-e-do-jahan ke saath
ummid hi nahin to guzar ja.egi yunhi
ik mehrban ke saath ki na-mehrban ke saath
ye soz-o-saz-e-ishq gham-e-javedan sahi
de umr-e-javedan bhi gham-e-javedan ke saath
manzil ka kya yaqin ho bata.e koi mujhe
jab rahguzar bhi hai ravan karvan ke saath
Leave a Reply