dil par gahra naqsh hai sathi laakh tiri dana.i ka
saat samundar bhi to na paa.en raaz miri gahra.i ka
chashma-e-ḳhun men Duub ga.i barat suhane taron ki
bojhal palkon par gahna ya chand miri tanha.i ka
jhuum rahe hain kaale badal daras ki pyasi ankhon men
kajal ban kar phail gaya hai daagh miri rusva.i ka
kitna hai anand tire is dhime dhime lahje men
tere dhiraj se nikhra hai rang miri ra.ana.i ka
mere dil se puchhe koi qadr ubharte suraj ki
meri aankh se dekhe koi ruup mire sauda.i ka
sandal jaisi rangat par qurban sunahri dhuup karun
raushan mathe par main varun saara husn ḳhuda.i ka
mera bikhra bikhra tan-man simaT gaya kisi chahat se
jaan ga.i huun bhed main teri bahon ki gira.i ka
Leave a Reply