Bit Gaya Hangam-E-Qayamat Roz-E-Qayamat Aaj Bhi Hai

biit gaya hangam-e-qayamat roz-e-qayamat aaj bhi hai

tark-e-taalluq kaam na aaya un se mohabbat aaj bhi hai

sakht sahi hasti ke marahil-e-ishq men rahat aaj bhi hai

ai gham-e-janan ho na gurezan teri zarurat aaj bhi hai

gulshan-e-husn-e-yar men karte hain jo talash-e-kaif-o-sukun

laakh hai barham nazm-e-do-alam zulf men nikhat aaj bhi hai

nur-e-sahar hai jan-e-tasavvur zulmat-e-shab se kaun Dare

laakh bani hai ziist jahannam samne jannat aaj bhi hai

subh-e-bahar aai thi le kar rut bhi nai shakhen bhi nai

ghuncha-o-gul se pyaar hai lekin shakh se nafrat aaj bhi hai

arz-e-tamanna kar ke ganvaya ham ne bharam khuddari ka

ho gai go takmil-e-tamanna dil ko nadamat aaj bhi hai

kar ke sitam ki parda-poshi ham ne unhen be-aib kiya

varna ‘shakil’ apne honton par harf-e-shikayat aaj bhi hai

Leave a Comment