main tujh ko sochne baiThi to ye ḳhayal aaya
ki aftab-e-mohabbat ko kyon zaval aaya
hamari halat-e-dil dekhne ke qabil thi
tiri juda.i ka jab samne saval aaya
ḳhuda ke fazl se hasil sada uruuj raha
hamari soch ke suraj ko kab zaval aaya
havas-parast andheron ne us ko gher liya
ufuq pe jab bhi kisi ka mah-e-jamal aaya
hunar ki daulat-e-be-misl yuun nahin paa.i
jala hai ḳhun-e-jigar tab kahin kamal aaya
ka.i the ahl-e-talab laakh ḳhubiyon ke magar
hamari ziist men ik shaḳhs be-misal aaya
Leave a Reply