Jaikrishn Chaudhry Habeeb
aariz ashkon se tire tar nahin dekhe jaate
ḳhaak men rulte ye gauhar nahin dekhe jaate
dekh sakta huun zamane ki badalti nazren
tere badle hue tevar nahin dekhe jaate
aa.ina bhi ruḳh-e-raushan ke muqabil na rahe
ham se koi tire ham-sar nahin dekhe jaate
dil ke sagar men jo har sham-o-sahar uThte hain
vo talatum kabhi bahar nahin dekhe jaate
muskurate hue chehre pe nazar sab ki paḌi
zaḳhm dil ke magar aksar nahin dekhe jaate
husn ke jalve jo dekhe tire divane ne
hosh valon se vo aksar nahin dekhe jaate
qadr kar qadr mire zauq-e-nazar ki saaqi
sab hasin yuun to mukarrar nahin dekhe jaate
mai-kada apna hai aur bada-o-saqi apne
ghair ke haath men saghar nahin dekhe jaate
ye hasin vadi-o-dariya gul-o-gulzar ‘habib’
bin tire mujh se ye manzar nahin dekhe jaate
Leave a Reply