Rabt Paida Ho Gaya Tha

Sahartab Roomani

rabt paida ho gaya tha

dasht dariya ho gaya tha

vaqt ke is aa.ine men

aks buḌha ho gaya tha

umr aadhi rah ga.i thi

kaam dugna ho gaya tha

main haqiqi zindagi men

ḳhvab jaisa ho gaya tha

log mil kar ja rahe the

vaqt puura ho gaya tha

dard baaqi tha badan men

zaḳhm achchha ho gaya tha

baat puuri ho chuki thi

zehn chura ho gaya tha

ḳhamushi baḌhne lagi thi

shor itna ho gaya tha

kuchh nahin tha main ‘sahar’ bas

dil-girafta ho gaya tha