Azm Shakri
chahta ye huun ki benam-o-nishan ho ja.un
sham.a ki tarah jalun aur dhuan ho ja.un
pahle dahliz pe raushan karun ankhon ke charagh
aur phir ḳhud kisi parde men nihan ho ja.un
toḌ kar phenk duun ye firqa-parasti ke mahal
aur peshani pe sajde ka nishan ho ja.un
dil se phir dard mahakne ki sada.en uTThen
kaash aisa ho main teri rag-e-jan ho ja.un
bas tire zikr men kaT jaa.en mire roz-o-shab
nuur ki shaḳh pe chiḌiyon ki zaban ho ja.un
ḳhaak jis kuche ki malte hain farishte aa kar
main usi ḳhaak ke zarron men nihan ho ja.un
meri avara-mizaji ko sukun mil jaa.e
dard ban kar tire siine men ravan ho ja.un
Leave a Reply