payam le ke jo paigham-bar ravana hua
hasad ko hiila mila ashk ko bahana hua
vo meri aah jo sharminda-e-asar na hui
vo mera dard jo minnat-kash-e-dava na hua
khayal men na rahin suraten azizon ki
vatan se chhute hue is qadar zamana hua
vo daagh jis ko jagah dil men di thi jite-ji
charagh bhi to hamare mazar ka na hua
pari-vashon ko sunate hain qissa-khvan ‘bekhud’
hamara haal na thahra koi fasana hua
Leave a Reply