Ayub Khawar
is qadar gham hai ki iz.har nahin kar sakte
ye vo dariya hai jise paar nahin kar sakte
aap chahen to karen dard ko dil se mashrut
ham to is tarah ka bevpar nahin kar sakte
jaan jaati hai to jaa.e magar ai dushman-e-jan
ham kabhi tujh pe koi vaar nahin kar sakte
jitni rusva.i mili aap ki nisbat se mili
aap is baat se inkar nahin kar sakte
aap kar sakte hain ḳhushbu ko saba se mahrum
aur kuchh sahab-e-kirdar nahin kar sakte
ek zanjir si palkon se bandhi rahti hai
phir bhi ik dasht ko gulzar nahin kar sakte
ye gul-e-dard hai is ko to mahakna hai huzur
aap ḳhushbu ko giraftar nahin kar sakte
Leave a Reply