kabhi ankhon pe kabhi sar pe biTha.e rakhna
zindagi talḳh sahi dil se laga.e rakhna
lafz to lafz hain kaghaz se bhi ḳhushbu phuTe
safha-e-vaqt pe vo phuul khila.e rakhna
chand kya chiiz hai suraj bhi ubhar aa.ega
zulmat-e-shab men lahu dil ka jala.e rakhna
hurmat-e-harf pe ilzam na aane paa.e
suḳhan-e-haq ko sar-e-dar saja.e rakhna
farsh to farsh falak par bhi suna.i dega
meri avaz men avaz mila.e rakhna
kabhi vo yaad bhi aa.e to malamat karna
kabhi us shoḳh ki tasvir bana.e rakhna
‘baḳhsh’ sikha hai shahidan-e-vafa se ham ne
haath kaT jaa.en alam munh se uTha.e rakhna
Leave a Reply